Bydd deg mil o ‘fagiau Nadolig’ yn cynnwys larwm mwg, calendr Ymladdwyr Tân 2009 a llyfryn ‘Dathlu yn Ddiogel’ yn cael eu dosbarthu ar draws De Cymru wrth i’r Nadolig agosáu.

Yn 2007-8 roedd 826 o danau damweiniol yn y cartref yn Ne Cymru.  Digwyddodd 96 o’r rhain ym mis Rhagfyr ac achos bron hanner ohonynt (41) oedd coginio. Roedd 209 o danau damweiniol yn y cartref yng Nghaerdydd, sef y lleoliad ar gyfer lansio’r Calendr sy’n cynnwys deuddeg o negeseuon diogelwch.

Bydd calendr 2009 yn cael ei lansio mewn digwyddiad yn yr Ice Café yng Ngŵyl y Gaeaf Caerdydd brynhawn ddydd Llun.  Bydd Ymladdwyr Tân o’r Ganolfan Hyfforddiant (Porth Caerdydd), adran Diogelwch Cymunedol (Malpas), Ymyrraeth a Rheolwyr Rhan Amser (Pont-y-clun, Pencadlys) a Gorsafoedd Tân Bargoed, Malpas, Pen-y-bont ar Ogwr, Canol Caerdydd, Brynbuga, Dyffryn, Penarth a Threlái oll i’w gweld yn y calendr newydd.

Sêr eraill y calendr yw plant o Feithrinfa Bute Cottage, Ysgolion Cynradd Victoria ac Evenlode ym Mhenarth ac Ysgol Gynradd Llanilltud Faerdref yn Church Village. Mae June Webb o Glwb y Byddar Casnewydd i’w gweld yn llun mis Ionawr yn derbyn larwm mwg wedi’i gynllunio’n arbennig ar gyfer pobl â nam ar y clyw.

Bydd pob Gorsaf Dân yn Ne Cymru yn dosbarthu’r bagiau Nadolig wrth gasglu enwau a chyfeiriadau pobl sydd â diddordeb mewn derbyn archwiliad diogelwch tân yn y cartref mewn archfarchnadoedd a chanolfannau siopa ddydd Llun.

Bwriad ymgyrch y Nadolig yw codi ymwybyddiaeth ynghylch y pwyntiau allweddol canlynol: 

• Sicrhewch fod plygiau wedi’u gosod â’r ffiwsys cywir, a bod plygiau wedi’u gwifro yn gywir ac nad yw’r gwifrau wedi treulio neu wedi’u difrodi mewn unrhyw ffordd
• Peidiwch â gorlwytho socedi trydanol
• Diffoddwch oleuadau Nadolig a thynnu’r plyg o’r wal pob tro pan nad ydych yn eu defnyddio, cyn mynd allan neu cyn mynd i’r gwely
• Peidiwch â gadael bwyd yn coginio -  trowch y ffwrn i ffwrdd pan fyddwch yn gadael y gegin
• Peidiwch â choginio pan ydych wedi meddwi - gall alcohol effeithio’n ddifrifol ar eich barn
• Peidiwch â defnyddio goleuadau addurnol sydd wedi’u cynllunio ar gyfer defnydd tu mewn y tu allan, hyd yn oed os yw’n edrych fel bod cysgod iddynt rhag y tywydd
• Peidiwch â gadael canhwyllau’n llosgi ar eu pen eu hunain, na’u gosod yn agos i’r goeden Nadolig, celfi neu lenni
• Mae addurniadau yn llosgi yn hawdd -  peidiwch â’u gosod ar oleuadau na gwresogyddion
• Gwnewch yn siŵr fod sigaréts wedi’u diffodd yn llwyr
• Cadwch gardiau Nadolig, hosanau, anrhegion, addurniadau a phapur lapio wedi’i waredu i ffwrdd o lefydd tân agored a gwresogyddion
• Cadwch goed Nadolig go iawn i ffwrdd o danau a ffynonellau gwres eraill gan eu bod yn hynod hylosg, yn enwedig wrth iddynt sychu
• Cynlluniwch lwybr dianc os bydd tân a gwnewch yn siŵr fod eich holl westeion yn gwybod ble mae allweddi'r holl ddrysau a ffenestri yn cael eu cadw

Bydd y calendr yn nodyn atgoffa dyddiol o rai o’r pethau allweddol gall pobl wneud er mwyn aros yn ddiogel yn y cartref ac ar y ffyrdd drwy gydol y flwyddyn.

Dywedodd Martin Henderson, Pennaeth Diogelwch Cymunedol Gwasanaeth Tân ac Achub De Cymru,
Bydd y rhoddion Nadolig yn cael eu targedu ar lefel leol gan ein Hymladdwyr Tân a fydd yn dosbarthu’r pecynnau i bobl sydd yn yr archfarchnadoedd yn gwneud eu siopa Nadolig.

Coginio yw un o brif achosion tanau damweiniol yn Ne Cymru felly dylai’r rhoddion a ddarparwn atgoffa pobl i aros yn ddiogel dros y Nadolig yn ogystal â dros weddill y flwyddyn. Os oes unrhyw un am i’r Gwasanaeth Tân ac Achub osod eu larwm mwg ar eu cyfer, gallant ffonio rhadffôn 0800 169 1234 i ofyn am archwiliad diogelwch tân yn y cartref ac fe fyddwn yn gosod y larwm a’u cynghori ar sut i gadw’n ddiogel.

Dywedodd y Cynghorydd Anthony Ernest, Cadeirydd Awdurdod Tân ac Achub De Cymru,
Rydym yn hynod falch i lansio’r calendr hwn fel rhan o’n hymgyrch dros y Nadolig. Gobeithio bydd ein cymunedau yn elwa o’r larymau mwg a’r archwiliadau diogelwch tân yn y cartref a ddarparwn er mwyn mwynhau 2009 mwy diogel.