Dywedodd y Prif Swyddog Tân Andy Marles:

Yn ystod tywydd gwael rydym yn gofyn i bobl fod yn arbennig o ofalus er mwyn sicrhau eu diogelwch ac i ddilyn unrhyw gyngor ynghylch aros adref ac osgoi teithio os nad oes rhaid.

“Pan fydd pobl yn aros yn eu cartrefi adeg yr amodau oer hyn mae’n debygol y bydd gwresogyddion ychwanegol oedd wedi’u storio yn cael eu defnyddio, neu ganhwyllau. Os byddwch yn defnyddio’r rhain sicrhewch nad ydych yn eu gosod yn rhy agos i eitemau eraill a allai gynnau ar dân, fel llenni, dillad neu ddodrefn.

"Dylid gosod canhwyllau mewn daliwr canhwyllau ar arwyneb gwastad, cadarn a gwrth-wres fel plât bwyd ac ni ddylid byth eu gadael heb neb i ofalu amdanynt.”

Mae Gwasanaeth Tân ac Achub De Cymru yn rhoi’r cyngor canlynol:

Adroddiadau tywydd

Cadwch lygad ar adroddiadau tywydd ar sianeli newyddion teledu neu radio lleol. Peidiwch â theithio mewn stormydd eira trwm oni bai ei fod yn hollol angenrheidiol.  

Teulu a chymdogion

Gofalwch am deulu a chymdogion hŷn i sicrhau eu bod yn cadw’n gynnes ac yn ddiogel.

Afonydd, pyllau a llynnoedd wedi rhewi

Peidiwch â cheisio cerdded ar lynnoedd neu afonydd sydd wedi rhewi. Er bod y rhew yn gallu ymddangos yn ddigon cadarn i gario pwysau mae’n gallu mynd yn  denau iawn yn gyflym iawn. Gall yr arwyneb dorri yn rhwydd, ac agor gan achosi i bobl gwympo drwodd. Gall y canlyniadau fod yn angheuol.

Cadwch eich ci ar dennyn ar bwys dŵr wedi rhewi.

Os ydych yn gweld person neu anifail yn cwympo drwy rew ac yn mynd i drafferthion peidiwch byth â cheisio eu hachub eich hun. Yn hytrach, ffoniwch 999 yn syth.

Gyrru yn y Gaeaf

Mae angen i fodurwyr fod yn hynod ofalus a sylwgar ar y ffyrdd dros y gaeaf a gallu addasu pan fydd yr amodau yn newid. Gall y gyrwyr mwyaf profiadol fynd i drafferthion pan fydd rhew ar y ffyrdd.

Holwch eich hun a yw’r siwrnai yn hollol angenrheidiol.

Cyn cychwyn eich taith:

• Sicrhewch fod eich cerbyd mewn cyflwr addas i’r ffordd yn y gaeaf
• Gwiriwch fod eich teiars yn bodloni’r gofynion cyfreithiol. Gall teiars nad oes ganddynt y gwadn cyfreithiol gael effaith ddifrifol ar dyniant a llywio eich car.
• Cliriwch ar HOLL eira a rhew o bob ffenestr. Cofiwch, mae’n rhaid eich bod yn gallu gweld i bob cyfeiriad.
• Gwiriwch y breciau, goleuadau a lefelau olew a hylif golchi ffenestri.
• Gwnewch yn siŵr fod eich drychau yn glir a bod y ffenestri wedi diniwlio yn llwyr.
• Cymrwch ‘Becyn Argyfwng’ yn cynnwys dadrewydd, crafwr rhew, tortsh, dillad cynnes, gwifrau cysylltu a rhaw. Hefyd cariwch esgidiau glaw neu fŵts, dillad sy’n dal glaw, diod poeth a ffôn symudol gyda batri llawn rhag ofn i chi dorri i lawr.

Os oes rhaid i chi deithio mewn tywydd gaeafol, cofiwch:

Gyrrwch yn hynod o ofalus ac osgoi unrhyw symudiadau cyflym am y gallai arwain at golli rheolaeth:

• Arafwch gan roi digon o le i stopio, gan gadw’n bell yn ôl o’r defnyddiwr y ffordd o’ch blaen. Gall pellter stopio fod 10 gwaith yn fwy nag ydyw ar ffyrdd sych.
• Gyrrwch yn araf ar eira yn y gêr mwyaf uchel posib, cofiwch gyflymu neu frecio yn ysgafn iawn i osgoi llithro. Os bydd eich olwynion yn cloi, tynnwch eich troed oddi ar y brêc yn araf.
• Trowch eich goleuadau ymlaen i’ch gwneud yn fwy gweladwy i fodurwyr eraill.
• Peidiwch byth â goddiweddyd aradr eira neu lori graean. Mae gwelededd y gyrwyr wedi’i gyfyngu ac mae’n debyg y bydd y ffordd o’u blaen yn waeth na’r ffordd tu ôl iddynt.
• Peidiwch â thybio y gall eich cerbyd ymdopi ag unrhyw amodau. Gall cerbydau gyriant pedair olwyn hyd yn oed fynd i drafferthion ar y ffyrdd yn y gaeaf.
• Gadewch fwy o amser i gwblhau’r daith nag y byddai’n cymryd fel arfer.

Os byddwch wedi’ch dal yn yr eira:

• Peidiwch â throelli eich olwynion. Bydd hyn ddim ond yn eich gwthio yn ddyfnach. Trowch eich olwynion o’r naill ochr i’r llall ychydig o weithiau i wthio’r eira o’r ffordd.
• Pwyswch yn ysgafn ar y sbardun i symud eich car allan.
• Defnyddiwch raw i glirio eira o’r olwynion a gwaelod y car.
• Rhowch dywod, graean neu halen ar hyd llwybr yr olwynion  - neu ddefnyddio eich matiau troed hyd yn oed – i’ch helpu i gael tyniant.
• Os oes rhaid i chi adael eich car, trefnwch i fynd i’w ôl cyn gynted â phosib. Os credwch ei fod mewn man a allai achosi perygl i ddefnyddwyr eraill y ffyrdd, ffoniwch yr heddlu i’w hysbysu.