Mae Gorsaf Dân Gymunedol Trélai’n gwasanaethu ardaloedd preswyl Glanelái, Caerdydd ac ardaloedd Gogledd Llandaf, Canton, Tyllgoed, Pentrebane a Sain Ffagan oddi amgylch. Mae tua 29,700 o eiddo domestig dros ardal ddaearyddol o ryw 5,551 hectar. Amcangyfrifir bod poblogaeth yr ardal tua 69,000 o bobl.

Mae Gorsaf Dân Gymunedol Trélai yn ymuno â chanolfan gymunedol ‘Jasmine’, sy’n cynnig cyngor am gyflogaeth a gwasanaethau cyngor eraill i aelodau’r gymuned. Mae gan y ganolfan Dîm Lleihau Llosgi Bwriadol hefyd, a’i gartref dros dro yn yr Orsaf.

Yn ogystal ag eiddo preswyl, mae Gorsaf Dân Gymunedol Trélai hefyd yn gwasanaethu nifer o ysbytai, ysgolion, neuaddau preswyl a nifer fawr o ardaloedd diwydiant ysgafn. Ymhlith yr adeiladau eraill ceir Amgueddfa Werin Cymru yn Sain Ffagan, y canolfannau siopa yng Nghroes Cwrlwys a stiwdios ITV Cymru.

Yn sgîl cwblhau canolfan Jasmine a threfnu bod ambiwlans argyfwng ar gael yn barhaus yn yr ystafell offer, mae’r Orsaf mewn sefyllfa dda i dreiddio i ganol y gymuned leol.

Ymatebodd eich Ymladdwyr Tân lleol o Orsaf Dân Trélai i fwy na 1295 o alwadau yn y flwyddyn Ebrill 2006 - Ebrill 2007, gan amrywio o Wrthdrawiadau Trafnidiaeth Ffordd, tanau cerbydau, i danau mewn cartrefi. Sicrhaodd ymroddiad eich criwiau lleol fod pob achos yn cael ei drin yn broffesiynol ar bob adeg. Yn ogystal ag ymateb i alwadau, ymwelodd eich ymladdwyr tân lleol â 634 o gartrefi lle gosodwyd larymau tân yn rhad ac am ddim a rhoddwyd cyngor i bob aelod o’n cymuned. Ymwelodd eich Ymladdwyr Tân lleol â 35 o ysgolion yn yr ardal gan addysgu’r plant ynglŷn â pheryglon tân. Sicrhaodd ymdrechion aruthrol yr ymladdwyr tân fod nifer y tanau damweiniol mewn eiddo preswyl wedi lleihau’n sylweddol o 48 yn 2005 i 39 yn 2006, a bydd criwiau’n gweithio gyda’n cymunedau i sicrhau bod y tueddiad hwn yn parhau ar i lawr a bod pawb yn ein cymuned yn ddiogel rhag tân.